立法會明早11點恢復二讀《截取通訊及監察條例草案》，秘書處已經通知各路人馬，如果傾到星期五都傾唔掂（有成200個修訂），咁周六、日都要開工，因為要趕及下周二之前完成審議。
呢條同當年基本法23條有得揮嘅條例，公民黨三大狀當然不敢怠慢，Ronny、Alan同Audrey分別喺噚日、今日同聽日返港，準備應戰。
湯狀一家大細，早前去美國參加個親戚嘅婚禮，之後去咗夏威夷度假，佢個囝囝今日A-level放榜，所以噚晚返咗香港等消息。至於傑哥Alan就一家去咗加拿大山區欣賞風景，今晚會返抵香港，但係聽講班機會delay，所以唔使去機場接佢。
余大狀都出咗埠，佢同醫生老公及囡囡去咗歐洲旅行，周三一早返到香港，啱啱趕得及條bill喺立法會復會開鑼。七月留低睇住個黨嘅吳靄儀，當然亦會披甲上陣，為截聽條例立法出力。