噚日寫完恒生銀行制訂新嘅服裝指引，以柯大班做示範，准班員工唔着西裝打呔，啱啱又有一間行加入便服行列，就係DBS星展，佢哋噚日出咗份內部通告，准許員工一至五，着輕便商務服飾。
之不過，同大部份同業一樣，呢個安排只係惠及後勤員工，做前線、要見客，或者開商務會議嘅，都要繼續執到正，費事俾人覺得唔專業啦！
星展話今次都係響應煲呔嘅呼籲，等班夥計涼爽啲，公司又可以慳番啲電費！
佢哋又話，全面推行新服飾指引之前，逢星期五啲後勤員工已經可以着得輕鬆啲，就算做前線着制服嘅同事，公司都照顧埋，提供有logo嘅poloshirt當制服，家吓只係將呢個「輕鬆」時限，由每周一日延伸到全天候，所以千祈咪話佢哋後知後覺！