住宅物業嘅身價，唔一定同樓齡掛鈎，有質素嘅物業，只要樓市氣氛唔差，出現有價有市嘅局面唔難。
近嚟港美股市當旺，息口又話有可能唔加住，好多人扑鎚買樓都容易咗，有錢佬買樓都爽啲，市場大銀碼貨成交量都唔少，好似薄扶林老牌大宅碧瑤灣，中原謝家哲話，啱啱個周末成咗兩件過千萬嘅刁，其中一單呎價仲接近6000銀，以超過30年樓齡物業計，非常好價。
碧瑤灣第28座喺75年入伙，樓齡31年，中層2332呎海景單位，連車位成交價1380萬元，呎價5918；買家係同區租客，睇好樓市自己做業主。另一單係樓齡29年嘅第48座，都係連車位嘅中層海景戶，2697呎，1520萬元，呎價5636，比較接近物業平均呎價5500蚊嘅水位。