去到K場，十幾人爭咪唱歌可算見怪不怪；但若然為咗爭Remote點歌，搞到大動肝火，繼而動武，咁又何必呢？上星期，諾記就搞咗個K場小派對，大家咪以為係歌唱比賽喎，其實係諾記與加州紅玩Crossover，公布一項全港首見嘅手機點唱服務，只要用自己部手機㩒個掣，你就可以揀歌、優先點播，唔使爭崩頭搶Remote，直頭可以用「齊歡唱」嚟形容！
記者、攝影：陳國輝
10米範圍任篤
呢項服務特別為S40及S60平台嘅藍芽手機而設，只要到任何一間加州紅安裝專用Java軟件，並輸入電腦所提供嘅藍芽配對碼，可即場於房間10米範圍內操作，內容包括100首新歌試唱、100首新碟推介、金榜、歌名及歌星選曲，甚至畀你覆查賬單等，想知每人夾番幾多錢，㩒個掣就睇晒啦！
呢套軟件仲特設「我的最愛」功能，最多可收藏100首歌，㩒個掣隨時優先點播，慳番傳統Remote逐步輸入嘅煩惱，不知快捷咗幾多！順帶一提，每間房可同時配對7部諾記藍芽手機，細至4人房，大至20人VIP房都夠晒用，以後仲使乜「傳波仔」點歌咁慘情呢！
查詢：Nokia（21366338）
Nokia亞洲首間旗艦店
另外，諾記早前於銅鑼灣開設全亞洲首間旗艦店。與一般客戶中心唔同嘅係，裏面設有不同類型嘅「體驗專櫃」，消費者可試用包括音樂、影像、連結以及商業方案等唔同內容，畀你慢慢試過、問過晒再決定買定唔買，服務認真體貼，食埋現場CyberLook及舒服寬敞嘅環境，都諗得幾周到。
