相比起阿媽滙豐,同樣喺噚日公布中期業績嘅阿仔恒生,感覺就親切好多。點解咁講,除咗清一色由本地薑主持大局,用晒廣東話之外,仲有專人斟茶遞水,又有點心供應,就連柯清輝都開口話:「我哋今次用咗全新嘅背景板,係咪親切好多呢?」
呢兩日有銀行從業員話,七天工作會影響終身幸福同家庭,柯大俠點都要解吓畫。佢話,要先計成本,考慮同事反應,又要睇吓係咪有實際需要,先可以決定幾多日工作,又話同啲員工溝通得好好,唔少做前線銷售嘅,都不知幾想周末開工,所以就算真係七天工作,員工嘅抗拒都唔會太大。
講完對內,又講吓對外收購,柯大班笑笑口話,佢哋積極揀對象,但唔可以好似年晚煎堆,人有我有,唔可以揀得太急;就算真係有對象,都會喺友好情況下談婚論嫁,絕對唔會王老虎搶親!