鄭大班幾好火氣，以洋洋數千字，大罵香港大學學生冇國際視野，竟然示威抗議港大校方增加國際學生宿位。鄭大班鬧得冇錯，假如港大學生畢業後，到英美留學深造，佢哋就會領略到身為國際學生申請唔到學生宿舍之苦。香港租金好昂貴，但仍然唔夠倫敦市中心咁貴，香港大學位於西營盤、薄扶林一帶，附近住宅嘅租金唔平，但唔會高得過倫敦大學UCL（大學學院），SOAS（亞非學院）及LSE（倫敦經濟政治學院）之鄰近住宅區。喺二○○四年七月七日倫敦地鐵、巴士爆炸之區域，古老學生住宅大樓之內，一間大房，夠擺兩張細床，加一個小廚房，月租要一千鎊起，試問國際學生點會唔打崩頭爭大學生宿舍住吖。爭唔到嘅話，就難為了父母或者犧牲學業時間去搵兼職。
香港成日話自己係國際城市，大學想搞國際化，金融中心要稱霸亞洲，硬件就有齊嘞，可惜部份市民思想未夠國際化，大學生並非特別思想狹窄，佢哋只係反映咗唔少本地人嘅意見而已。香港人思想未國際化之前，香港好難與倫敦相比，難以成為世界城市。
鄭大班識得咁多有錢人，與其痛罵港大學生，不如幫吓手，請富翁捐錢興建國際學生宿舍，以實際行動促進香港嘅大學國際化。有心有力有錢之人捐錢興建本地生宿舍嘅話，可以立即消弭本地大學生之不安與不滿；捐錢興建國際舍堂，大幅度降低國際生爭取宿位嘅壓力，本地生唔會嘈嘞啩！
日本名校早稻田大學冇一個靚校園，學校禮堂，課室就在街上。但一位大有錢佬在大學附近嘅一個小山上捐咗幅靚地（因位於豪宅區，五分鐘行到四季酒店，地價貴到驚人）出嚟，興建國際學生宿舍，環境靚到無倫，宿生主要係早稻田學生，但亦有慶應、東大學生，來自世界各地，留學生互相交流，徹底國際化。假如香港有富豪肯仿效日本大富翁，捐錢起宿舍嘅話，可說功德無量，對香港之國際化有極大貢獻，應得紫荊勳章。