與謝霆鋒再次復合的張栢芝，瘋狂投入程度猶如中了情降，商台昨日播出張栢芝訪問，肉麻程度爆燈，她大談和霆鋒復合如何甜蜜，愛他愛得不惜賣狗甚至犧牲事業，其間狂讚霆鋒至聲淚俱下，又稱當霆鋒是「老公仔」，言談間恨嫁恨到出面，又多次強調霆鋒不是利用她去宣傳上映的新戲，還說：「我張栢芝唔係冇腦㗎！」
曾因謝霆鋒一腳踏兩船而傷透了心、一度情緒失控和暴瘦的張栢芝，再次全情投入這段猶如走鋼線的戀愛，兩人高調復合的行徑，又再一次驗證霆鋒有搞作，就一定有緋聞，佩服！霆鋒主演的《龍虎門》剛上映，前晚就被傳媒拍下他和栢芝一起到杭州度假的照片，昨日早上商台查小欣的《巴巴閉邊個夠我查篤撐》節目，播出栢芝的電話訪問，趁勢追擊，栢芝言談間猶如中了情降，聲淚俱下地表白，肉麻程度令人毛管直豎；一旁的霆鋒不時插嘴作調皮狀，默契十足，兩人確實是天生一對！（以下商台訪問節錄）
問：節目主持 張：張栢芝 霆鋒：謝霆鋒
問：復合係幾時嘅事？
張：《無極》時做番朋友，大家都知道自己鍾意嘅人係邊個，所以就不知不覺喺番一齊囉。霆鋒個人好真、唔會害人，總之佢優點有好多。
問：霆鋒做過啲乜嘢事令你好感動？
張：我有乜嘢唔開心、有乜嘢危險，佢一定係第一個企出嚟嘅人。佢做呢啲事唔需要話畀你知，會暗地保護我。我同霆鋒好似，好多人都話我係女版霆鋒，我哋兩個都幾自閉，成日都匿喺屋企，佢打機我打電腦。
吓？
「霆鋒喺大陸真係好勁」
問：邊個提出復合？
張：係雙方都有感覺，我同佢18歲已經識，𠵱家差唔多識咗10年，總之喺番一齊係好自然。
問：再次復合，擔唔擔心壓力好大？
張：我想講霆鋒喺大陸真係好勁，佢唔係借我宣傳，人哋咁講我好無奈，經過咁多風風雨雨我會堅持到底。
問：你哋有冇啲好sweet嘅稱呼？
張：（笑）我唔想令啲聽眾嘔。
問：係咪叫老公仔、老婆仔嗰啲？
張：幾當佢係㗎，阿仔（指霆鋒）係咪就問佢啦。
問：會唔會諗結婚？
張：肯定有，我係一個要婚姻嘅人，但係我唔強求。
問：你係咪一個賢妻良母？想唔想生BB呢？
張：我個原則係唔去到結婚，只會煮公仔麵畀佢食，霆鋒試過我煮嘅嘢。有BB就有完美嘅生活，我同佢已經領養咗30幾個BB。
問：你會唔會犧牲事業去爭取呢段愛情？
張：我會，我唔係要出名有人問我攞簽名，我係想身邊有個錫自己嘅男人結婚生BB。
問：如果有廣告商叫你兩個合作應唔應承？
霆鋒：（插嘴說）睇乜嘢品牌，同阿女拍廣告可以㗎。
問：咁婚紗廣告呢？
張：（此時霆鋒本想開口說話，但栢芝突然尖叫）我唔會，呢一刻我要留畀我最愛嘅男人，咁先矜貴。
問：咁家庭用品廣告呢？電飯煲？
霆鋒：（又插嘴低聲說）飯煲，要嚟煮公仔麵呀。
張：（哈哈大笑）佢好煩呀，我唔介意同阿仔拍廣告，同鍾意嘅人拍BB用品廣告係好開心嘅事。
問：你同霆鋒都有紋身，今次會唔會再整愛的紋身？
張：我紋身係因為着bikini時靚啲，但霆鋒本身唔鍾意我紋身㗎，唔鍾意我低胸、暴露。佢係一個大男人，但係佢呢啲大男人令我更愛，因為我係一個鍾意被控制嘅小女人。以後着三點式都會喺屋企同霆鋒商量過先，佢同我講過我可以好好，（此時忽然激動哭出來，邊喊邊說）我去街買菜都會俾人寫到我係儍婆咁，但係有一個男人睇到我明白我，我真係好開心，我盡量會做到好好。
問：今次復合係咪打風都打唔甩？
張：我好希望係，外間成日睇我哋不可一世，其實我哋係鱷魚頭老襯底，我拍過好多次拖又公開過，始終都係返番去佢身邊，即係呢個人好啱我，有乜事、風風雨雨都可以對抗。阿仔喺出面做嘢打到傷晒都冇怨言（又再抽泣）……我兩個都好軟弱，以前好小事都有誤會、有爭拗，我一驚就有一個方法逃避，就係離開囉。
問：霆鋒之後去拍戲幾個月，會唔會去陪佢？
張：有機會一定會去陪佢，但係我又好驚啲人又話霆鋒又用栢芝做宣傳，因為𠵱家《龍虎門》同《詠春》都上啦，啲人又會話佢又攞個女人出嚟做新聞，我做呢個訪問係想最後一次唔想再有人誤會。（又激動哭起來）我身邊呢個人咁辛苦，拍戲拍到損手爛腳，我會照住，身邊嘅人咁辛苦咁成功我好開心。大家唔好再話佢用王菲同栢芝做宣傳，我張栢芝唔係冇腦㗎！
問：有相士批過霆鋒同你一齊運氣麻麻，擔唔擔心？
張：我當霆鋒完全相信相士咁講，佢都要堅持同我一齊，我希望同佢fightfor將來，touchwood佢有事我唔會離開佢，我會照顧佢，佢一定會幸福，我信我有事佢都會咁做，霆鋒心地好好。
問：霆鋒知你鍾意鑽石，有冇買鑽石戒指畀你？
張：（霆鋒在旁細聲說，栢芝代說）佢話佢好窮冇錢喎。霆鋒好聰明，知我唔係要樓要車，佢會畀驚喜我，有時佢行過見到花見到草會諗起我，呢啲比送豪宅更重要。
啋！
「我想擺酒時嘉賓都嘔」
問：有冇送過小禮物畀你？
張：（大笑）我唔想觀眾嘔呀，佢有時做愚蠢事好好笑，第時結婚做人老婆先講，我想擺酒時所有嘉賓都嘔。
問：婚期係幾時？
張：等阿仔去諗啦，我唔鍾意強求個男人講幾時，阿仔咁特別嘅性格求婚唔係咁簡單，一定係前所未有。
問：之前賣晒啲狗係咪因為怕霆鋒哮喘？
張：霆鋒唔可以聞動物，佢會眼腫、哮喘，賣狗呢個係部份原因。好多人都以為我儍，但係一生人嘅幸福，係難得搵到自己愛嘅人，梅艷芳姐姐講過話要珍惜眼前人，我同霆鋒都係想做就去做，只係佢EQ高，我就低低哋。
問：藝人要維持一段感情唔簡單？
張：咁艱苦我哋都一齊證明我哋幾愛對方，大家嘔咗未（大笑）？
問：養好身體生個BB或者請教你未來奶奶狄波拉？
張：（大笑）我有見過佢父母、霆鋒又見過我家人，我媽咪好鍾意霆鋒，佢知霆鋒會令我更開心。
撰文：林妃
