地產代理除咗要口才了得，形象都好緊要，專業一啲，講嘅嘢都有說服力啲。特別落力宣傳內部培訓活動嘅香港置業，最近搞咗今年第二次嘅「估價實務全攻略」，向前線員工灌輸物業同地皮嘅估價常識同程序。
大家可能會奇怪，物業或地皮估價同班經紀有乜關係？關鍵在於近年代理同發展商嘅關係，推盤清貨之外，其他範疇開始愈嚟愈多機會畀經紀入手，就算最簡單嘅日常吹風灌水，除咗物業市況同風花雪月，其他專業範疇就算知得唔多都起碼要搭得上嘴，實際幫到手更加好。
港置董事楊彩鳳解釋，自從政府放寬收購舊樓業權條例，加上勾地門檻高，唔少發展商為求吸納土地，都傾向收購舊區物業重建，為咗等班經紀可以緊貼市場走向，所以就搞啲相關課程，前後兩次吸引咗百幾人參與，𠵱家打算定期開班㖭。