兒時味道總令人懷念！經歷過打日本仔、中國近代黑暗時代的寬姐話，嗰陣有餐飽飯食已經好開心！記得當時老爸在廣州做廚，有次偷偷整了一味廣東名菜「鬼馬牛肉」，細路仔見到個名已經好開心，仲要咁好有肉食，所以寬姐等9兄弟姐妹一直深記在心；今天，老爸早已去矣！每次兄弟姐妹聚首都會想起這道菜；時代唔同、新食材變出新口味，寬姐變奏出「鬼火牛肉」，是點點的懷念，當中還滲着濃濃的親情！
記者︰劉昱蘭 攝影︰陳偉強 示範︰荃灣讀者寬姐
鬼火牛肉脆腍汁多
價錢︰$18/5人
需時︰10分鐘
材料︰牛肉4両、火龍果1個、油炸鬼1條
醃料︰胡椒粉/豆粉/糖各1/4茶匙、豉油1湯匙、生油1茶匙、薑絲少許
調味︰蠔油1茶匙、鹽1/2茶匙、麻油/酒各少許
芡汁︰豆粉1/4茶匙、水2湯匙
1.切醃牛肉
牛肉洗淨切薄片，與醃料拌勻；火龍果起肉切粒。
2.炒牛肉
起鑊炒牛肉，加入調味，炒至差不多熟透，落火龍果，然後埋芡上碟。
3.炸油條
油滾起後，落油炸鬼略兜，即可加在已上碟的牛肉上。
貼士︰炸油炸鬼時，油滾起後先熄火，攤一陣再開番火，油冇咁猛，油炸鬼就冇咁易燶。
蛋角勝瓜湯清甜香口
價錢︰$10/4人
需時︰20分鐘
材料︰蛋3隻、勝瓜1斤、豬肉5両、上湯4碗
醃料︰胡椒粉/鹽/糖/豆粉各1/4茶匙、豉油1茶匙
1.肉蛋拌勻
勝瓜切角；豬肉切碎醃好，打蛋時與肉拌勻，注意豬肉的份量不可太多。
2.煎蛋角
蛋漿落鑊形成小圓形，差不多熟透時，反起一半將蛋對摺成蛋角。
3.放料
上湯滾起後，先加入蛋角滾2分鐘令豬肉熟透，再落勝瓜滾2分鐘即可。
貼士︰若有用剩的冬瓜，可以清水4碗滾冬瓜代替上湯，湯水就更清甜。
雙冬煙肉夾清新鹹香
價錢︰$10/3人
需時︰15分鐘
材料︰冬瓜1/2斤、冬菇6隻、煙肉3片
芡汁︰鹽/豆粉/糖各1/4茶匙、冬瓜水2湯匙
1.切瓜
冬瓜切件、去皮、汆水，每件大小一致，中間𠝹開成夾狀。
2.釀料
冬菇浸軟、去蒂、開邊，煙肉切細塊；將冬菇及煙肉夾入冬瓜中。
3.蒸熟
入鑊蒸10分鐘，將冬瓜水倒出，加入調味煮成芡汁淋上冬瓜面即可。
Profile‧寬姐
戰前名菜
鬼馬牛肉！個名真係好鬼馬，唔講仲以為係邊間餐廳新諗嘅噱頭菜，不過寬姐話呢道菜，在她細路仔年代，其實早已是成名大菜。「喺嗰時，廣州好多茶樓菜館都可以食到呢味菜；當中的鬼，是指油炸鬼，馬就是指馬蹄；油炸鬼脆脆口，吸收晒啲餸汁味，馬蹄又清又爽口，食落真係好有層次感！」
火龍果代馬蹄
至於今次新整的鬼火牛肉，是舊菜的改良版，「近年好多齋舖都興用火龍果做餸，貪佢味清、健康又多汁，所以特意將馬蹄改以火龍果代替。」每年團年，身為大姊的寬姐都會整呢道菜，同9兄弟姐妹懷念老爸一番；佢仲話今日介紹的3道菜，都是兒時常食的變奏版：「冬瓜夾以前係夾金華火腿，但係呢啲貴價嘢，成日食就唔經濟，煙肉同火腿同樣有種鹹香，食落一樣咁好味。另外個蛋角如果照足傳統做法好難搞，反蛋時好易整爛，索性將豬肉拌勻蛋漿嚟煎，易煮啲但一樣咁香口。」