暑假檔期，電影大作紛紛上畫，《龍虎門》更刮起一陣港產漫畫熱潮，電影爆場程度仲勁過超人回歸！經典土炮拍成電影，Fans豈會錯過，可惜戲內雖具原著味道，但實際內容改動唔少，令Fans覺得未夠「原汁原味」。不過唔打緊，事關有隻叫《龍虎門Online》嘅網上卡片對戰Game推出，人物同招式以100%忠於原著，仲免費畀你登記玩。睇完電影未夠喉，上網投身龍虎門下，怒打火雲邪神出氣吧！
記者︰陸俊雄
練招似集圖
呢類角色扮演對戰遊戲，一定唔少得儲「呢」（Level）。遊戲設有成長系統，要玩家不斷學習新招，以實戰來提升功力。喺每局分出勝負後，勝方會得到獎勵卡包，即玩家會不斷得到新卡。好似筆者未夠班，只係得1星級嘅功力，就算拎張5星攻擊力嘅卡，都係得物無所用，出唔到招！
不過新手總有一天變老手，如用石黑龍，當一般雙截棍法滿足唔到你，好想使出絕技「十字追魂棍」，其實可透過買卡包，有機會得到一啲超厲害嘅招式卡，又或同人買賣、交換，好似玩集圖冊咁。想學王小虎「霹靂狂龍」、火雲邪神「黑級浮屠」，玩家真係要勤練武功。
經典場景對決
《龍虎門Online》唔只角色同招式跟足原著，就連決戰場地都係經典重現。呢個遊戲雖然冇故事模式，不過戰鬥背景同電影一樣，主要講龍虎三皇俾火雲邪神踩場後，決心殺上羅剎教再挑火雲邪神，所以遊戲內有齊王降龍創辦嘅龍虎門、石黑龍出手救王小虎嘅日本餐廳、火雲邪神地頭嘅羅剎教總壇及畫舫等。如果用王小虎對火雲邪神，喺龍虎門互抽一番，仲要係小虎改變歷史打低踢館嘅火雲邪神，Fans一定大叫頂癮，直頭想拎番床下底啲珍藏出嚟重溫一番！
打聯賽做武林盟主
其實呢隻OnlineGame仲有多種比賽模式緊接推出，如打聯賽、盃賽、淘汰賽等，十足十打《Winning》咁熱鬧，務求令玩家愈玩愈興奮。呢啲賽事唔只係官方搞，仲可以自行舉辦，真正民間互鬥！此外玩家亦可自組幫派，畀機會你打響名堂，做武林中各幫盟主。不過要數最搞鬼係攝錄重播功能，玩家可將對戰過程錄低，傳畀網友分享你點威！
漫畫招式重現
暫時仍最得漫畫迷歡心嘅王小虎，打咗咁多年肯定絕招多到無譜，想練到王小虎上身，真係要加把勁儲卡同練招嘞。
人物卡跟足原著
用卡使出經典絕學
呢隻《龍虎門Online》玩法容易，主要係網上2人對打，以出卡形式下達指令，叫角色使出真功夫。最吸引Fans嘅，係卡面嘅人物圖案，擺晒姿勢嘅王小虎同石黑龍等人，全由文化傳信同玉皇朝授權使用；引發出嘅招式，亦係漫畫嘅經典絕學，如王小虎嘅滾地龍、龍在九天等腿法，叫人回味無窮。
要喺遊戲中成為「武林第一」，就要熟悉手上出招卡嘅用法。揀好角色後，就要喺開波前「更換卡組」，在過百張卡牌中選定40張，當中包括戰鬥卡同爆氣卡。但喺進行對戰時，40張卡係不依次序隨機派出，既講彩數亦講臨場布陣得宜，所以學識幾時攻、幾時守、幾時爆氣出超必，都靠經驗累積返嚟。
PROFILE
遊戲類型︰網絡對戰
對應機種：PC
遊玩人數：Online
登記費用︰全免
代理商︰GamaniaHK
網址︰www.gamania.com.hk/dragontigergate
試Game後感
當年Fans李先生︰「今日三十幾歲人，當年身邊好多朋友都有睇《龍虎門》，我自己當然唔例外！隻Game動作畫面雖然唔係一流，但係可以睇番咁多經典畫面同招式，Fans已經夠晒滿足。」
OnlineGame迷阿輝︰「《龍虎門》雖然唔係陪住我成長，但佢個大名就一定識。隻Game試玩過之後，覺得最吸引人嘅地方係慢慢育成啲經典招式出嚟。如果啲招一早畀晒你，再玩落去都冇意思喇！」
