內地小生胡兵早幾日喺新加坡拍攝劇集《超級男女》一場打鬥場面時唔小心整傷肋骨，點知前日又整傷埋隻右腳。
休息三周
事緣胡兵前日要拍一場爬樹戲，工作人員為免佢再受傷，已經做好一切安全措施。初頭拍攝都好順利，點知臨尾胡兵喺樹度爬番落嚟嘅時候，突然覺得頭暈，跟住隻腳就踏空，跌咗落地，扭傷隻右腳，即時又紅又腫。
不過，胡兵受傷之後唔係第一時間入醫院檢查，而係堅持拍晒當日所有戲份先入院。噚日馮仁昭同佢通過電話，佢話：「當日係新加坡外景嘅最後一日，為咗唔想阻礙拍攝進度，所以只好撐住。」胡兵話照完X光後，醫生話佢右腳腳踝嚴重扭傷，要休息三個星期，仲要靠枴杖行路，今次梗係苦過弟弟啦！
