港股連升6日，昨日高開低收，恒指升過159點之後，升幅收縮到16點埋單。滙控（005）半年成績，市場焦點所在。食粥食飯，睇滙控。
下晝4點12分，倫敦嘅滙控成緊966.50便士，盤數彈出之後，4點16分彈上986便士，5點正造978.5便士，折合141.94港元，較本港收市價140.10元高出1.84元。滙控半年多賺15%，好過市場預期。恒指昨日較萬七點低29點，今朝9成機會升破萬七，好友今回食飯多過食粥。
滙控C輪9043：滙控上次高位，係5月份嘅142.40元，借住今次張靚靚成績表，好易上破上次高位，揀滙控C輪炒吓。第2中期息1.17港元，本月中除息，折合股價0.84%。炒短期C輪，要計埋除息因素，搵遠期少少C輪埋手比較着數。
正路之選係9043，12月初到期，輪價82仙，溢價2.1%，槓桿率17.1倍（有效11.1倍），引伸波幅17.7%。
恒指C輪4983：諗住滙控帶住個市上，買恒指C輪，對象係4983。11月尾夠鐘，輪價23.6仙，溢價2.4%，槓桿率14.4倍（有效9.9倍），引伸波幅19.3%。呢隻熱門貨，數據適中，睇錯市手起刀落掟出街唔使5秒。
恒指如果刺激過度，譬如話彈升300點，過咗火位，則做短期淡友，買恒指P輪，吼10月杪夠鐘嘅3766。
章盛