蘭西噚日收到兩份第一太平戴維斯嘅新聞稿，第一份開頭講乙級寫字樓嘅市道分析，揭到第二頁，筆鋒一轉，忽然爆出西環堅城中心，交由一間國際測量師行暗盤出售，仲大讚物業有升值潛力。
蘭西心諗，照計一太唔會咁樣幫行家賣廣告，打去一問，原來嗰間「國際測量師行」就係一太；再問落去，物業會招標，9月21號截標，仲叫蘭西幫手宣傳吓。其實正正經經出份宣傳稿，大家自然清楚晒，偏偏故弄玄虛，如果啲記者朋友唔夠蘭西咁八卦，打爛沙盆問到篤，個盤想見報都幾難。
另一篇內容加埋唔夠30隻字，只係話陳超國嘅銜頭係「第一太平戴維斯估值及專業顧問有限公司董事總經理」。同以前乜分別都無，點解要特登出份稿呢？原來太多行家簡寫成「一太董事總經理」，即係佢阿頭李偉文個位，唔怪得要嗱嗱聲澄清喇！果然係醒目打工仔。