巴甲波由於盤口鬼鬼祟祟，一直都唔係球迷至愛，但正因盤路鬼怪，先吸引到為贏錢而嚟嘅捧場客。將喺周中出戰自由盃嘅聖保羅同國際體育會，雙雙喺周日聯賽主場失分。
其中聖保羅更好無恥咁收起咗9名主力，終於俾山度士大炒4:0；國體會亦喺主場俾下游嘅甘美奧迫和，逢自由盃前呢兩隊都係會留吓力，各位捧場客要留意嘞！
自由盃4強，聖保羅將於主場出戰墨西哥嘅瓜達拉哈拉，佢哋首回合領先1球，話就話可以睇住嚟食，但1球始終唔保險，所以為咗呢場波聖保羅都唔敢唔喺本土聯賽留力；喺周日主場聯賽，聖軍竟只派老將阿歷斯戴亞斯同門將羅渣里奧2名正選搏殺，擺明想送3分畀山度士使，卒之球隊亦「順利」被山度士狂數4粒。
哥連泰斯8不勝醜怪
至於國際體育會亦「得償所願」，主場同甘美奧打成0:0，呢兩隊鑊鑊出戰自由盃之前，都會喺聯賽失吓分，跟住自由盃又有好表現，如果捉到路嘅話，真係隨時賺到笑！
至於「包艇」嘅哥連泰斯就慘咯，出埋列卡甸奴、泰維斯同馬斯真蘭奴，都輸埋畀「反晒底」嘅聖十字，認真醜死怪；哥軍已經8場不勝（輸7場），唔通上季拎完冠軍今季就嗱嗱臨降班？
「巴甲雙雄喺今屆自由盃分途出擊，??家又齊齊留力，各位捧場客喺周中下注時要留意呢點喇，話唔定決賽都係由佢哋兩隊碰頭㗎！嗱，求大俠就話今屆係聖保羅天下，信不信由你！