估唔到昨日投資者將注意力擺晒落滙控（005）同埋恒生銀行（011）之餘，仍記得仲有工業股。
經紀黃昨日推介的ASM太平洋（522）果然不負所望，中午公布靚靚業績後，股價下午大幅抽高，結果收報39.05元，升11.41％，成交金額增至1.6億元。
由於ASM喺今朝先至同分析員見面講古仔，小初眼見即日鮮都執咁多，所以急急沽貨食糊，但沽完之後又怕可能沽早咗。
除ASM外，昨日大昌微綫（567）走勢更矚目，勁升21.95％，收2.50元，成交股數2475萬股，金額5922.58萬元。
經紀黃好早已推介大昌微綫，但佢見隻股昨日咁升法，都覺得有多少過份。
佢話隻股雖然由虧轉盈，線路板定單陸續有來，並且有芬佬睇好埋位，但由幾毫子一條氣咁抽上嚟，升勢未免過急，現時PE亦已升到10倍，就算再升都水位唔多，無謂再追。
慕容小初