唐唐推出備受爭議嘅開徵商品及服務稅（GoodsandServicesTax）文件，同肥彭冇端端空中格劍，梗係唔夠人打啦，結果佢老哥寫完「來論」同「家書」後，真係拍拍籮柚就走咗──同家人度假去也，八月中先至再返工。唐唐有子初長成，要為佢升學做好準備，所以年年都全家出埠。咁唐太好緊張啲細路讀書，當然要實地考察喇。
GST有成九個月諮詢期，𠵱家周街都係反對聲音，首先梗係因為文件推出前選擇性吹風，做得太差；其次就係唐唐唔應該亂咁同肥彭呢啲超班馬開火，自暴其短；最後竟然連自己友自由黨都出嚟作反，搞個「齊心反對銷售稅」大遊行，真係想唔收檔都幾難。