若說賭王何鴻燊命帶桃花，相信冇乜人會反對，最近，連澳洲模特兒都搵上門，不過咪羨慕，今次係為咗打官司。
呢單官司緣起於十年前，話說賭王喺澳洲黃金海岸高貴地區人工島CroninIsland，買咗幅地諗住起度假屋，點知打樁同裝修時製造咗啲滋擾。
住喺隔籬嘅澳洲模特兒兼藝員JoanWater話，賭王間屋打樁造成「強烈震盪」，令佢間三層高嘅屋出現裂痕，亦令佢嘅精神大受困擾，搞到有抑鬱症……所以告到上昆省最高法院，要求賠償120萬澳元。
本來佢告嘅係承建商，點知承建商後來清盤，呢筆賬算到賭王頭上，代表賭王嘅律師回應都係嗰句：「寃有頭、債有主呀，小姐。」
結果，呢單案上星期喺澳洲高等法院宣判，控方敗訴，佢嘅賠償要求亦被推翻，牙擦擦嘅賭王又贏一仗。