噚日，滙豐銀行出業績，孫柏文都有睇吓。滙豐作為我哋特區嘅老牌銀行，又係恒生指數當中最重磅嘅公司，呢幾日都應該會有好多、好多嘅業績分析。我都唔想多講關於業績嘅事，所以都係得句「利潤升15%，滙豐又交到功課」。其實今日，我係想同大家分析一下新上任嘅滙豐主席葛霖，喺佢嗰篇「集團主席之意見」裏面，覺得世界經濟會點，特別係佢擔心啲乜。雖然，佢講世界經濟嘅篇幅只有百幾字，不過分析起來，真係有少少似睇花旗國聯儲局嘅聲明。
首先，我想攞番今年4月，前滙豐主席龐約翰喺滙豐年報裏面，對於世界經濟展望講過嘅嘢。喺4月或嗰份年報裏面，龐約翰講世界經濟展望，都係得嗰一句。佢話過：「美國經濟表現堅穩，而作為全球經濟增長主要動力的美國消費市場亦保持強勁。」真係非常之簡單、直接咁解釋咗佢點睇世界經濟前景。
今次份中期業績報告裏面，滙豐主席葛霖就講得比較多。佢話：「（全球）住宅物業市場開始放緩，而美國的情況較為明顯。」即係話佢都驚花旗國樓市出事。講開花旗國樓市，佢仲話：「利率調升會對即將需要重訂利率的可調息按揭貸款產生衝擊，勢將對部份借款人構成壓力。」即係話佢最驚嘅係呢幾年，喺花旗國用超低短期利息借咗錢去買樓
保護主義抬頭
根據估計，今年下半年，將會有多過一萬億美元呢類「可調息按揭貸款」要再做按揭。所以絕對明白點解葛霖主席會咁關注呢樣嘢。其實滙豐已經感受到花旗國樓市爆煲嘅負面影響，主席話：「我們已開始看到若干業務範疇近期敍造的按揭貸款之中，有部份客戶群的信貸質素出現惡化迹象。」呢句我相信都唔需要同大家分析，因為非常清晰。
不過，葛霖主席講嘅以下一句，先至係令我隻金手指最服。因為真係世界經濟長遠增長嘅最大隱憂。佢慨歎：「世貿組織多哈回合談判破裂，令人失望…惟愈來愈多迹象顯示，世界各國在貿易方面漸傾向採取保護主義…我們理應朝着相反方向發展。」二十世紀，三十年代嘅世界大蕭條，就係世界各國貿易上採取保護主義，令到經濟衰退變成大蕭條。我都希望滙豐可以將多哈回合起死回生，不過只可以慨歎：「有啲嘢，就連滙豐都做唔到！」
最後，昨讀王冠一兄專欄，如頓悟初醒，對晚輩之指正，獲益良多，蒙王兄之「欲速則不達」贈言，將銘記於心，日後當自省自勉。晚輩讀番書良久以致中文生疏，冒請不昧下以西文再表心迹：「Withthemosthumbleheart,Ithankyou.」
孫柏文