提起開徵銷售稅，真係天怒人怨，身為反銷售稅大聯盟主席嘅方剛，梗係要瞓身反對；今個星期日自由黨搞大遊行，佢又點可以唔去支持吓？原來方剛呢世人都未上過街，今次為咗銷售稅處男下海，已經證明到佢幾不滿啦；方剛仲笑笑口話要買番對新波鞋去遊行，真係好認真對待佢嘅第一次噃。可惜佢位靚太太一向唔多理佢嘅公事，所以今次都唔會陪佢一齊出征。
自由黨有名富貴黨，今次搞遊行，睇怕都有唔少富貴人家參加，所以佢哋都好識做，將遊行時間定喺朝早10點，咁就唔怕曬親人啦。方剛都話由於路程只係由遮打花園至政府總部，十幾廿分鐘搞掂，加上日頭未到頂，都唔使搞乜防曬裝備，帶定支水去就OK啦。