滙控噚日公布中期業績，上次仲係以集團CEO名義到場嘅葛霖（StephenKGreen），今次第一次以集團主席身份主持大局，吸引過百中外記者到場，喺會前粒幾鐘已經去霸靚位，唔少被派去做恒生中期業績（六點開波）嘅記者，都寧可趕兩場先到一到，為嘅只係想見新主席一面！
新官出場，葛霖由鄭海泉同埋邵銘高傍實，三個高層都西裝骨骨，加埋一條紅色公司呔，非常搶鏡。成個業績會，主席就梗係講得最多嘢，其次就係鄭大班，但最吸引華華嘅，反而係台上全程齋坐冇出聲嘅邵銘高。
點解？成場業績會搞咗粒幾鐘，做高層嘅邵銘高就梗唔會噚日先知道盤數啦，所以當主席同鄭大班滙報時，唔知係咪佢知道晒大家講乜，所以就經常兩頭望，捽眼、擦鼻、托下巴乜都做齊，跟手又將對眼鏡又除又戴，好似小朋友坐唔定咁，加埋佢天生趣怪的表情，真係靜雞雞搶番唔少風頭！
曾教授財息兼收
至於大笨象盤數，又係比預期靚，有對大獅子坐鎮果然好掂；其實佢牛皮咗咁耐，見股價近排由百三升上百四，顯然係春江水暖，應該唔使「滙豐大好友」曾淵滄教都估到實係好環境。
消息入市之後，隻大象喺倫敦已經即刻搶咗上去，今日睇嚟會紅盤見人，滙豐小股東可以慶祝，而曾教授財息兼收，仲贏晒牙骱。
李華華