世事就係咁神奇，前衞生署署長陳馮富珍都可以競選世衞總幹事，除咗中央同煲呔曾之外，估唔到連親疏有別嘅白鴿黨首領馬丁（圖）都鬼咁緊張。
話說立法會噚日繼續審議吸煙條例草案，馬丁媽叉政府容許已註冊嘅香煙牌子，可以喺名稱上繼續用mild同light嘅字眼，係偏幫煙草商。佢仲話政府咁樣做法，會破壞香港形象，會影響陳馮競逐世衞總幹事。
馬丁掟咁大隻鑊落嚟，衞生福利及食物局署理副秘書長陳煥兒都唔知點頂，即刻反駁話政府平衡咗各方利益，並無偏幫，相信唔會影響陳太嘅競逐工作。
而一向最反對禁煙嘅飲食界張宇人就話，好擔心業界唔夠時間準備，再次要求將修訂草案嘅生效日期推遲至條例通過後90日先進行。不過陳煥兒睬你都儍，話當局已廣泛宣傳，條例會喺1月1日生效，等市民更易掌握。