「成行成市」通常係形容大量售賣同類貨品嘅店舖集中埋一齊，但若果用嚟形容教會，大家又點睇呢？蘭西會咁形容，皆因沙田小瀝源都會廣場，愈嚟愈多教會進駐。
聽中原新界區工商部助理營業董事李淑筠話，都會廣場低層05至06室，面積4465方呎，啱啱由教會用810萬買入，呎價1814。聽講呢個教會喺樓上都揸咗啲貨，𠵱家仲搵緊同廈嘅單位買。
賣地舖 搬上樓
蘭西聽講佢哋其實仲持有大廈地下01同02室共11444方呎，月前至以3433萬賣咗，收番一大筆錢，咁咪喺樓上搵單位買，𠵱家仲未買夠。不過，最特別係接呢兩個地下單位嘅買家，竟然係另一個教會。
點解啲教會對呢幢商廈情有獨鍾？原因怕且係都會廣場交通方便，加上多個教會進駐後，宗教形象鮮明，所以咪愈聚愈多教會囉。既然大廈咁受教會團體歡迎，啲業主放盤就唔使驚冇承接啦。
都會廣場宗教色彩咁濃，其他單位嘅員工日日都接觸到福音，有冇受到感召信埋主呢？
電郵地址：[email protected]