煲呔要連任，應該冇問題，餘下工作除咗搵CS，至緊要係搞好個班底，搵夠自己友坐晒局長啲位，當日老董腳痛唔撈，阿爺下令問責局長同行會成員一個不能換，只准你加人，結果有個別人士煲呔雖然非常厭惡，都要死忍。咁趁今次換屆，煲呔當然乘機喺舊部中揀蟀，加以培養，等佢哋明年可上位。
第一個當然係AO中最打得嘅Carrie林鄭月娥，佢阿姐當年有常秘都唔做，向煲呔以及孫公攞特別人情，自願由D8降級至D6，外放去倫敦做經貿辦事處處長，名為要陪兩個仔去英國讀書，但有人就話係要避開老董。
八方都知道Carrie素以家庭為重，佢當年拒絕請菲傭，等啲小朋友學習獨立，唔好事事靠他人之手，連書包都要人幫手攞。呢種教仔方法，香港好多父母都唔明解，林鄭實在苦心。然而世事難料，Carrie駐倫敦一年，佢位舊上司掃街大隊長曾蔭權忽然做咗特首，仲飛鴿傳書召佢回港相助，林鄭知道今次推無可推，於是安頓好老公同兩個仔，今年三月毅然孤身回朝勤王，為煲呔效命。
唔捨得離開公務員隊伍
如果有得揀，林鄭梗係想重返財經事務局或者係衞生福利局，因為前者睇住個庫房，「控制開支」係佢強項；而後者乃係佢所愛（佢大學讀社工），可惜事與願違，煲呔要佢落區，輔助肥平，做民政局常秘。
煲呔同肥龍當然知Carrie心有所好，但係權衡輕重，地區連繫對穩定大局同埋選拔人才（或者叫收買人心）至為重要，一定要派一個強人同埋忠心耿耿之士，至可以強政勵治，咁就非林太莫屬。
林鄭既冇後顧之憂，當然全力以赴。民政係煩啲同埋花時間多啲，但係絕對考唔到佢阿姐牌。煲呔目前用人之際，林鄭57年生，明年7月剛好50出頭，正係前途無限，如果佢肯接肥平做問責局長，煲呔一定開心到死，問題係聽林鄭聲氣，佢都係有啲唔捨得離開公務員隊伍，所以最後是否成事，就要睇煲呔落嘅咀頭是否夠吸引啦。
講開民政，大換班應該好快完成，副秘余志穩過檔去咗扶貧委員會，接咗凌潔貞做秘書長，佢老哥早前放大假，今日正式到位。至於接佢嘅馮永業已經返咗工，坐喺林鄭隔籬。康文署長黃倩儀就傳話會由煲呔另一愛將周達明接班。林太麾下，人強馬壯，肥平幾唔掂都冇有怕啦。