陳冠希與李璨琛變身三級片男星，早前合演從影以來最殘暴電影《狗咬狗》，前者演殺手，後者做探員，他們坦言為拍好戲出現競爭心態，最難忘是在垃圾山搏鬥，竟有曱甴飛入琛仔口中。
陳冠希（Edison）與李璨琛合拍的三級片《狗咬狗》將於本月中上映，Edison飾演一名黑市拳手，來港殺人賺錢的柬埔寨青年，全程只有十句柬埔寨語對白，琛仔則是追捕他的重案組頭目，因同袍不斷被殺，最後流落柬埔寨，為了生存竟步Edison後塵，打黑市拳及殺人。
拒絕交行貨
琛仔及Edison都視今次演出為大突破，兩人日前接受本報訪問，Edison說：「我唔清楚香港嘅接受程度，相信部戲去美國、法國、日本都會好，人哋以前講到香港電影，會講《古惑仔》、《無間道》，以後大家會話《狗咬狗》。」琛仔也謂大家都很盡力，尤其Edison從未如此凶狠過，他說：「佢咁投入，我唔可以求其交貨，搞到好似有競爭。」Edison補充道：「係喺健康嘅環境下競爭，唔係想你死嗰隻，其實喺香港拍戲有啲人真係想你死，即係嗰種我做得好就夠，唔理其他人，但電影係teamwork，一齊做戲唔只要做好自己。」
禾稈草𠝹肉
二人都視《狗》片是一個變的好機會，但過程很辛苦，Edison記得在泰國垃圾山拍攝的日子很難受，他說：「嗰度全部係膠袋，四圍有好多曱甴。」琛仔想起都想嘔：「我講講吓嘢成隻飛曱甴飛咗入口，要嘔番出嚟，好彩冇吞到，我哋打交碌咗粒幾鐘，覺得自己都係一嚿垃圾。」
還有最辛苦的是Edison要在戲中噴黑全身，噴油過程45分鐘，然後再要等6小時才乾透，平均7日補噴一次，之後狂拍打戲。琛仔最辛苦是日日被打，還要磨泥上身，他謂：「啲泥係耕田紅色嗰種，黐入肉就洗唔甩，沖一個鐘都唔掂，又要剃眼眉同剃頭，ending嗰場喺架貨車後面好多禾稈草度搏鬥，我冇着衫，啲草𠝹肉到不得了，全身傷晒，好痛。」
天秤兩男兒
兩位老友同屬天秤座，Edison說：「我哋一年見到幾次面，係最好嗰幾個朋友。」琛仔聞言說：「唔係成日見，但keep住有新鮮感。」至於兩個男人如何走在一起，Edison說：「我哋基本上性格一樣，大家鍾意hiphop、街頭文化同女人。」琛仔說：「品味唔同，你鍾意嘅我未必鍾意，有啲人乜車都揸，有啲人只揸某啲車。」Edison謂：「遲啲我哋會再合作，唱吓粗口歌。你真係唔夠機會，俾你把握到一定有突破。」琛仔無奈地說：「我等緊個機會，係要變。」
採訪：蔡如玉 攝影：林德雄
