明代「蘭陵笑笑生」寫嘅《金瓶梅》係中國名著之一，同時都曾經係中國禁書，入面有啲關於西門慶同潘金蓮嘅情慾描寫，有唔少人認為好露骨。唔知係咪去完美國浸鹹水，思想都會開放啲，葉劉早前接受港台節目《打開衣櫃》訪問時，就向市民推介呢本禁書，因為呢本書對晚明嘅腐敗社會刻劃得相當細膩，可惜就冇乜提到，自己點睇男女主角嘅一段情，真係美中不足。
除咗《金瓶梅》，葉劉亦同時推介《紅樓夢》，尤其對咁多人研究紅學感到好驚歎。葉劉喺美國讀書期間，分別用咗十本參考書睇以上兩本中國巨著，佢話好享受呢段日子。有興趣者不妨今晚7點扭去亞視，睇睇葉劉書櫃入面仲有無其他經典書。