杜指上周五急升119點，全周升幅3.2%，去年5月以來最大升幅。當晚滙控（005）ADR造141.16（較港價高1.36元），中移動（941）51.27元（較港價高1.02），中海油（883）6.70元（較港價高8仙）。
今朝港股勢必高開，跟住點樣，要睇埋收市後滙控張中期成績表係點。
新地C輪9209：上周美股有氣有力，原因包括美經濟增長放緩，進一步加息機會減低。本港地產股好鍾意唔加息呢類新聞，吼地產股C輪埋手。
新地C輪揀9209，12月中到期，輪價70仙，溢價1.7%，槓桿率11.7倍（有效8.4倍），引伸波幅19.9%。想搏殺，贏多啲或輸多啲，則揀2230。
長實C輪9381：長實C輪可以揀9381，明年2月初到期，輪價1.02元，溢價4.9%，槓桿率8.3倍（有效5.9倍），引伸波幅26.1%。
恒指熊證：上周五，6205成為第1隻死亡嘅恒指熊證，因為恒指早段升破17000回收價（收市低過17000已唔關事）。「回收價」好聽啲，實際係「即時死亡價」。市場仲有4隻同類證6209、6211、6204及6214。6209「即時死亡價」係恒指17200，恒指升多二百幾點，6209就會走上6205嗰條不歸路。其他3隻「即時死亡價」係17300與17500，可以捱耐少少。
章盛