年輕貌美經紀Karen：謝太，有個壞消息。我叫你買嗰兩隻「市跌就贏、市升就輸」嘅恒指熊證，其中一隻6205，因為恒指升穿17000點，所以觸動到6205嘅回收機制。
資深股票客戶謝太：回收機制？即係發行莊家「有殺錯、冇放過」？
Karen：係啊謝太，真係唔好意思，今次真係要講聲sorry。兩個禮拜前，我叫你買嗰隻6205，一手用咗2750蚊。上個禮拜五發行莊家回收，每手回水900蚊，蝕咗成67%。第二隻熊證6211，都跌咗差不多一半。今次真係失敗。
謝太：咁又唔使道歉，炒股票就係咁，唔係贏就係輸。不過講真，經過今次，真係覺得呢啲新式牛熊證，真係比以前普通認股證或者認沽證難賭。
Karen：以前炒普通認股證最乞人憎嘅地方，就係有溢價。而因為溢價嘅膨脹或縮減，就係莊家決定，所以莊家只要將溢價提高或減低，就算認股證後面隻股郁，都可以令到隻認股證唔郁。
謝太：不過，牛熊證有回收機制，個取捨就係呢到。講真，Karen你當日叫我買呢兩隻恒指熊證，都係因為你覺得股市會跌。就算而家隻6205畀莊家殺咗，隻熊證6211係唔係應該繼續揸？
Karen：因為上個禮拜五晚美國股市升咗好多，所以我驚香港股市今日星期一一開市，就會連熊證6211，都會觸動到佢嘅恒指17300點回收價。今時今日，個股市剩返一個變數，就係美國聯儲局究竟會唔會繼續加息。下一次聯儲局決定加息會議，將會係8月8日舉行。原本係6月尾，美國債市已經將債券嘅定價，反映係8月舉行嘅會議裏面，會有90%機會加息。不過到禮拜五，債券嘅定價示意只有少過30%機會繼續加息。
謝太：即係話市場覺得好大機會唔會繼續加息？不過畀我估，Karen你一定唔服。我咁多次聽你講美國通脹走勢，你都係覺得失控。雖然到呢一刻我都同意，不過我唔明白點解市場又唔係咁諗？
Karen：呢廿幾年來，美國只要有經濟衰退，通脹就會受控。咁呢排就有好多關於美國經濟放慢嘅消息，所以市場就覺得通脹將會受控。如果通脹受控，就等如唔會加息。咁市場亦覺得，即至到上個月愈來愈高嘅通脹率，都已經係過咗去嘅事，未來因經濟會繼續放慢，通脹率自自然然會跌。當然，我完全唔同意，我覺得個市睇錯，經濟真係會繼續放慢，不過通脹率都唔會跌。
謝太：stagflation，滯脹？咁美國個市咪就會好似70年代咁，跌多過升？
Karen：係就係。不過，以前有個炒股票嘅經濟學家叫做凱恩斯，佢話過：「Themarketcanstayirrationallongerthanyoucanstaysolvent。」即係叫我哋就算個市係錯，都千祈唔好同個市鬥氣。