雖然身為泛民一員，但大班鄭經翰一向都幾獨來獨往，好似最近泛民話截聽條例要綑綁式投票，大班就話明唔一定跟大隊投反對票；不過佢同時又話咁樣又唔等於係投票支持喎。正正反反，同陳方安生話唔參政但唔排除選特首一樣咁矛盾。
鄭大班點解未必反對截聽條例呢？因為佢係受害人，梗係想執法人員可以將啲衰人拉晒。如果啲執法人員縛手縛腳，又受到唔少嘢限制，難以同啲罪犯大鬥法，試問又點破案呢？所以大班話係站喺受害者角度去睇呢件事。
佢一再強調，其實最後嘅投票意向，都要視乎某啲修訂過唔過到，總之唔可以咁快下定論啦；呢個態度，同陳方安生「見步行步」言論都有得揮。