今日7月31號，唔係半年結，唔係期指結算，亦唔係咩大日子；不過，四十二年前呢一日，有一個數字誕生，就係恒生指數。
乜恒生指數唔係69年面世咩？唔好駁住，恒生指數的確係69年推出，但推出時有追溯前幾年嘅走勢，並且以64年7月31號做基準，當日嘅恒指係100點。
當𠵱家萬七點計，42年間股市約莫升咗170倍，平均一年翻四番。
聽恒生銀行老行尊講，當年搞個指數，諗住用作行方內部參考，後來覺得對社會有用，於是公諸於世並大力推廣；成件事係利國偉籌劃，今日利蛇退咗休，但呢個指數仍然係香港經濟寒暑表。
×××
恒生銀行響應曾特首號召，准許員工着便服上班。時代改變，政局改變，商業世界有時亦無奈要配合，雖然華華始終覺得銀行家、律師、醫生之類專業人士，唔着西裝打呔令人冇乜信心。
然則恒生嘅便服，便到點呢？華華睇過個指引，要點如下：一、要見客者要着商務服飾；二、要着制服者繼續着制服；三、唔使見客唔使着制服者，一至五可以着「商務便服」，即係可以唔打呔唔着西裝套裝，但唔可以着運動鞋；周六可着「輕鬆便服」，不過仍然唔可以着背心、運動褲、短褲、三個骨褲、牛仔褲、波鞋、拖鞋，屐都唔得。
係咪好複雜？唔緊要，有辦睇。柯清輝大班在年報張相點打扮，跟住着就冇錯。
李華華
讀者如有任何意見或報料，歡迎發送電郵至[email protected]。