有時我覺得，太平盛世，點解我哋啲女仔都要好似打緊仗咁，餐餐無肉食，淨係食蔬菜吖？但為咗可以有窈窕嘅身形，呢一代女性屋企嘅雪櫃，都係放滿蔬果，搵啲肥肉都無；不過，蔬菜有時放一陣間就乾晒水，乾爭爭咁，好核突。﹙＞○＜﹚
呢排上網發現，有台灣專家教路，點樣可以保存好啲菜，唔會輕易變得乾爭爭；就係將啲菜用個保鮮袋包住，再喺袋底剪兩個細洞，然後放包菜喺鋅盆，開水喉用水浸滿成包菜，然後等三分鐘，等啲菜慢慢吸收水份，而多餘嘅水就喺個洞流走；當菜表面嘅水流乾，就可以密封袋口放入雪櫃，咁樣啲菜就無咁易乾身變枯。
噚晚去食家劉健威間私房菜食飯，佢話蔬菜之所以會乾身係因為無晒水份，尤其係喺運輸期間流失咗；如果畀番足夠水份佢吸收，可以保存得耐啲，但就唔可以表面有太多水，因為咁好易爛，所以個袋要留個洞，流晒啲水去。佢仲話，如果啲菜真係枯乾少少，可以用水浸一浸，就會變番挺身：「睇落去無咁肉酸！」但佢話如果菜變黃，就神仙難救。(~.~)
等我又教大家另一個保存薯仔嘅方法，就係幫薯仔沖一個熱水涼，用熱水淋一淋佢，因為熱水可以殺死薯仔身上嘅芽點，咁佢哋唔會再發芽啦！大家試吓吖。(^_^)
逄周一刊出