做知客好辛酸？今年31歲做咗10年知客嘅Elaine點睇？「都係㗎！經常俾人無理取鬧，試過有個客人喺繁忙時間嚟到，因為無訂位畀唔到位佢，佢就拍枱拍櫈勁鬧我，鬧到其他客都睇唔過眼，幫我攔住佢。」成日受寃屈氣未算慘，最慘係無論乜嘢時候都要擺出一張笑容燦爛嘅面孔，「屋企有親人去世，明明好傷心，但對住客人都一定要笑。無計㗎，做得知客就一定要笑㗎喇，我係酒樓嘅第一線員工，唔笑實俾老闆詐型，何況客人又無做錯事，自己點唔開心都唔可以黑口黑面對客人㗎喇？」
做知客又要企又要受氣，點解仲要舂個頭埋去做呢行？「一開始只不過做暑期工樓面，可能自己鍾意講嘢啩，做知客可以成日同人吹水，咪試吓做囉。𠵱家我同好多客人都係Friend，有時佢哋見我唔開心，都會安慰我㗎。」再問，發覺原來唔止安慰咁簡單，「生日會收到客人送嘅花，有時仲會收到小禮物，好開心㗎！」呢個時候經理搭嘴：「有好多人追佢㗎，佢自己唔知咋！」Elaine一笑置之，望吓佢隻無名指，噢，戴咗隻結婚戒指，原來已名花有主，各位人客，都係無行喇！
記者：黃若茵
攝影：陳盛臣
（上）鳳冠帶子餃$24
（下）蟹子燒賣皇$20
帶子餃餃皮好煙韌，餡料除帶子外有蝦肉，都幾彈牙；燒賣皇比一般燒賣大件，份量贏晒。所有點心於平日上午及假日上午至下午都有半價，抵食！
朱洪武豆腐$58
朱洪武即朱元璋，話說佢做皇帝後，好掛住做和尚嗰陣食嘅豆腐，御廚就將金華火腿同爽口竹笙夾喺豆腐入面，再沾蛋白炸，用貴價豆腐博皇帝一笑。
燒鵝瀨粉$8
下午茶時段供應，抵食到爆，極受歡迎！雖然只賣$8，但無話將貨就價，份量適中，而且鵝皮又薄又脆，我食完一件又一件，認真好味道。
熟客有Say
寶湖海鮮酒家（28506638）
地址：中環租庇利街1號喜訊大廈1樓至3樓