滙豐總行地下大堂裝修咗一段日子，唔少中環友都叫華華八吓呢個工程，對門口兩隻「鎮行銅獅」──史提芬（Stephen）及施廸（Stitt）有乜影響。
滙豐話，工程絕對唔會騷擾到兩隻獅子，事關「口擘擘」嘅史提芬同埋施廸喺總行外面駐守咗71年咁耐，其間只係短暫行開過兩次咁多；如果冇乜特別原因，唔會亂搞對獅子，一則因為風水，二則佢哋各重2250磅，要郁都唔係咁易。
至於銅獅行開嗰兩次，唔係去咗蛇王，係非不得已。話說二次世界大戰（1945年）嗰陣，香港淪陷，兩隻獅子俾日軍充公，差啲俾人熔鬼咗。
另一次就喺八十年代初期，滙豐總行舊廈拆卸重建，呢對孖寶寄居喺皇后像廣場，直到新行落成，再由風水專家計過，喺85年6月1日重返崗位。
滙豐全球一共有三對銅獅，第一代喺上海，香港呢對第二代按照上海嗰對嚟做；第三對放喺倫敦集團新總部大樓外面，用第二代嘅倒模造成，家吓係三代同堂。