香港賽馬博物館最近有個以「探索」為題嘅藝術展開幕，展品都係由5,500個智障、弱視同弱聽嘅小朋友親手所造，有繪畫、剪貼畫、布偶，甚至鐵線雕塑，睇完真係覺得藝術無邊界。
呢班來自56間特殊學校同幼兒中心嘅小朋友原來參加咗一個由馬會出錢，香港藝術中心同香港展能藝術會統籌嘅「校本藝術計劃」。當中有一個「種子計劃」，重點栽培有潛質嘅小朋友，喺上周開幕禮上，兩位小藝術家呂家慧同莫俊傑嘅媽咪都話囝囝囡囡變得專注同主動，佢哋嘅作品係一條畫有圖案嘅透明「塑膠腸」。
呢個計劃已經係第二年舉辦，展覽開幕當日馬會副主席陳祖澤同衞福局局長周一嶽都有到，個展覽開到10月29號，有興趣可以去睇吓。