邵氏賣盤傳到消息滿天飛，大家關心嘅梗係最值錢嘅TVB喇，話晒咁多年出過咁多人才，好似就快飛過去花旗三藩市，做美洲高級副總裁嘅國泰大公關黃家倫（Alan），都喺TVB打過工，雖則只係一個暑假咁多。
Alan話，幾十年前嘅事，唔係華華同佢傾開，連自己都未必記得。佢話，當年TVB有好多由外國買返嚟嘅劇集同電影，佢負責將啲英文劇本繙譯成中文，個個星期都去電視台攞帶返屋企開工，一盒一盒咁逐一繙譯，呢份係佢大學時期唯一一份暑期工，所以印象都幾深刻！
點解做一個暑假咁少呢？佢話，TVB份工雖然自由，收入都唔錯，之不過自己鍾意玩，一放假就同班朋友四圍去蒲，冇收入都唔計較，做人最緊要開心喎。咁鍾意周圍去，唔怪之得喺國泰可以做咁耐啦！