香港著名攝影師黃岳泰被本報拍到背妻偷食鐵證，昨日他承認飲醉酒一時糊塗，並向太太羅秀慧道歉。黃太兩度接受本報電話訪問，初時顯得頗為徬徨，表示還未打算如何處理此事，其後則態度大變力撐老公，並指事件不算嚴重，看來已原諒了丈夫。
曾六度奪得香港電影金像獎最佳攝影、現任香港專業攝影師學會會長的著名攝影師黃岳泰，與曾任職嘉禾製片的妻子羅秀慧結婚七年，一直以恩愛夫妻姿態出現，日前他竟難耐七年之癢背妻偷食，被本報拍得與火辣靚女街頭舌戰，繼而到時鐘酒店開房，傷盡老婆心。
「未諗應點做」
昨日黃岳泰太太羅秀慧兩度接受本報電話訪問，語調平靜的她初時表示未知如何處理事件，同時感到徬徨無助，她說：「唔開心實有，我噚晚已經知，𠵱家你再問我，我都唔知點答。」問她對這段婚姻有何打算？她說：「未諗到呢個問題，啱啱發生嘅事，我哋𠵱家仲一齊住，到呢一刻都係。」據悉，黃岳泰的情人是幕後人，羅秀慧不正面回應是否認識她，只說：「認唔認識都唔重要啦，都發生咗。」她表示還未與丈夫為此事作溝通，問她看完報道有何感覺？她說：「冇乜感覺，都未諗應該點做。」
事隔不到一小時，羅秀慧在做好心理準備下再接受本報電話訪問，並極力維護丈夫，問她會否原諒老公？她說：「唔使講到咁嚴重。」老公偷食是否感到受傷害？她竟說：「我唔識講呀，成個報道都幾無聊，佢又唔係幕前人，唔係明星，我都唔係呢行嘅人，寫嚟都冇讀者有興趣睇。」
問羅秀慧是否不生氣？她說：「我唔會用嬲呢個形容詞，成件事本來唔使向外界交代，係泰哥嘅私人嘢，不過登咗出嚟都冇計。佢用佢嘅專業去工作，唔係私生活。」
「平時唔係咁」
男主角黃岳泰昨日接受本報電話訪問時表示要鄭重向太太道歉，自己是酒後糊塗才做錯事，他說：「我平時真係唔係咁㗎，嗰晚我都飲咗好多，先會一時糊塗做錯事，𠵱家最緊要嘅係點同老婆同埋外家嗰邊交代。」
採訪：李全
