今年喺尹光入行50周年，佢前晚喺理工大學賽馬會綜藝館舉行《樂韻光輝濃情香港半世紀演唱會》，入座率八成，都吸引唔少中年觀眾入場。佢照例講吓有味笑話同唱啲俗套飲歌，點知開場時有啲小風波，啲觀眾激動到叫回水。
醒目識執生
話說大會諗住拍低個騷出VCD，台前就擺咗幾部攝錄機，點知遮住部份觀眾嘅視線，啲觀眾買飛入場睇唔到，梗係嬲啦，群起鼓譟，喺台上嘅尹光起初唔知乜事，只聽到觀眾嘈話睇唔到，咪行前啲話：「乜事呀？我企呢度睇唔睇到呀？不如講個笑話你哋聽啦。」同時工作人員就開始搬開部份機器，但觀眾們都唔收貨，大叫回水繼續狂鬧至機器清晒為止。
尹光惟有話：「放心，我周圍行，每個角落都會睇得我清清楚楚。」觀眾們先識笑番，佢仲落台同全場人握手，又展身手拉小提琴、講粗口笑話，尹光問觀眾邊個生肖最辛苦，台下人十二生肖數晒出嚟，佢就話：「係猴年辛苦，唔信你用國語讀。」觀眾捧腹大笑。個騷總算圓滿結束，尹光話：「我畀80分自己，我喺台上唔知發生乜事，都係靠執生，我梗明白觀眾俾嘢阻住有幾嬲，好彩搞掂。」
