星期六下晝落雨，在國金食完晏，過去四季聽有線搞嘅財經創富論壇。本來諗住捧吓馬局長場，點知去到發覺場面好勁，500人坐滿四季BallRoom，施永青老闆同曾淵滄教授在台上講樓市，馬局長在台下做筆記，啲現場觀眾起身發問，個個都有料到，仲勁過啲記者。
由此可見，財經資訊喺香港有好大需求。大多數人手上有一筆錢想投資，但唔知買咩好，有人肯教吓路、分享投資心得，大家落大雨都嚟學嘢。
咁樓市究竟點睇呢？施老闆話一切等一個紅盤。佢話個市調整咗成年，但大家仍冇信心入市，要等有一個盤，賣得好好，例如兩三日清貨，咁信心就會返晒嚟。點先至有呢個紅盤？施老闆話一定係大發展商推，而且肯減價，因為佢哋手上貨多，減價賣晒一個盤之後，其他盤去到貨可以補番條數。
佢又話大家現時入市買樓自住唔會錯得去邊，但短炒唔容易賺錢。曾教授就話，佢自己雖然鍾意炒股票，不過大部份身家都投放在物業上，因為咁樣安樂啲，冇咁易心臟病發！