關你車事：BentleyContinentalGTC開住篷可以306km/h　拍得住「林寶」

幾個月前已經聽唔少車友話等緊賓利架ContinentalGTC亮相，個個都話想一睹其開篷英姿，結果一等就等咗幾個月，真命天子終於在上個禮拜四運到Showroom，今次我都有幸可以一睹其真面目，但可惜，架車8號又會運走，好彩我都唔執輸幫佢影咗輯靚仔相，想唔想知佢同大佬GT邊個靚仔啲？即刻帶你睇個夠本。
記者：黃婉冰
攝影：黃子偉　Model：Joey

560匹豪華「巨跑」

驟眼睇，GTC外形同大佬GT差無幾，但我就覺得GTC「英」好多，尤其是開篷後，GTC望落足足後生幾年。除外形外，今次GTC所用嘅引擎同GT一樣，都係嗰副可以輸出560匹馬力嘅W12雙Turbo引擎，所以咪睇佢咁大嚿好似無咩跑格，查實只要佢副引擎一發力，一樣可以好似跑車咁「飛」住去。你可能會懷疑，開篷之後係咪仲咁有速度先？我可以話你知，就算軟篷大開，最高速一樣可以去到306km/h，關上篷後，速度高達312km/h，由0-100km/h都只需要5.1秒，拍得住林寶堅尼架「Gallardo」（開篷極速307km/h），所以話，咪以為佢同其他豪房一樣一味得個好坐同舒服，其實佢都一樣可以畀你享受到嗰種高速嘅無頂快感。好多開篷車都有同一個缺點，只要一將個篷收起後，行李箱即刻形同虛設，空間容量大大減少，好彩今次GTC完全唔會有呢個問題出現，因為設計師特別將尾懸掛從新設計過，務求做到可以同GT一樣充裕嘅前、後座空間。

改裝備提高舒適性

開篷跑車，最重要係安全性同舒適性，呢方面廠方當然唔會馬虎，安全措施方面，車身經過了特別加固程序，同時又在後座頭枕加設彈出式翻車保護裝置，令安全性大大提高。為令乘客、司機同樣可以得到最高的舒適性同操控感，新車用上一套可適應任何路面嘅四驅系統、氣壓避震、6前速半自動波箱，加上車廂各項高科技設計，一句講晒，ContinentalGTC畀我嘅感覺，就好似一架古董加科技嘅跑房車混合體。