停車熄匙，目的係減少排放；減少排放，目的係希望（注意，係希望）地球表面溫度唔好連年上升，令到冰山融解，海洋擴大，海水升高，水浸紐約、曼谷、香港。一句話，睇《明日之後》，睇戈爾嘅最新紀錄片，我哋就會嚇餐死，日日掛住四個字──減少排放，否則我哋會目睹世界末日。
咪住，喺大水浸紐約，令到啲富裕人家浸死之前，非洲嘅愛滋病、瘧疾及其他傳染病，已可能將整個非洲變成無人地帶。非洲人命值錢吖，還是美國人、英國人、歐洲人、日本人、中國人嘅人命值錢？答案簡單得很，當然係後者緊要好多。之不過呢啲高度政治不正確嘅言辭，政治人物，公共人物，邊度膽敢宣諸於口吖！所以戈爾博晒老命，拍攝一套紀錄片嚟嚇美國人，題材完全與非洲無關，與自由派WASP（WhiteAnglo-SaxonProtestant）有關。美國觀眾掛住溫室效應，邊有興趣知道非洲在哪裏？雖然美國WASP家庭，無論中產或者富翁階級，都時興叫仔女去非洲做義工，其心態與十九世紀傳教士到非洲拯救人類差不多。
本欄講過一位丹麥人Lomborg本是環保分子，研究環保問題一輪之後，竟然得到結論話減少排放並無甚麼大意義，於是立即俾環保分子攻擊得要死。對呢位丹麥先生嚟講，乜嘢最有大意義呢？佢搵到八位頂級經濟學家（最冷血，只講現況，唔講感性嘅動物）討論，得出結果就係研究愛滋病、瘧疾對當今世界最有貢獻，投入產出回報率最高。減少排放？一百年後先至講啦，等非洲人脫離死亡威脅之後先至講都未遲。
曾先生𠵱家好有感性，叫我哋停車熄匙，可能立例強性執行。唔想喺烈日之下坐在的士內等客而焗暈嘅司機大佬，他日可能因為唔肯停車熄匙而坐監！世界首富蓋茨猛咁捐巨款研究愛滋病，可見啲真正叻人，眼光視野係高人一等。