前布政司鍾逸傑傳出好事近，八方噚日終於搵到佢老人家，佢猛話：「我哋係好朋友，冇談婚論嫁。」八方聽到佢咁講，本來準備好恭喜佢嘅說話，馬上收番埋先，更加要向佢位好朋友講聲sorry。睇嚟鍾叔好緊張呢份感情，叫八方千祈唔好再提，否則誤事。
唔講情事，都可以講政事。鍾逸傑同香港有深厚感情，喺佢之前嘅英籍高官，退休後多數會返回老家，但係佢就喺香港定居，仲好活躍，不時會就香港嘅政制發展提出意見，葉劉就特別推崇佢個兩院制。
而鍾叔做會長嗰個香港工商專業聯會，最近都有就特首選舉辦法向策發會交報告，話未來嘅提名委員會要以現行嘅選舉委員會為藍本，即係要保持有四個界別，包括工商、專業、基層同政界；同民主派建議由立法會議會組成提名委員會完全唔同方向。