呢排我哋《蘋果日報》都非常之貼市咁報道，有關特區傳媒業龍頭（以市值計算）股票編號511，TVB嘅相關新聞。邵逸夫爵士出入院、去飲茶等等嘅消息，我作為一個以前都睇過吓特區傳媒股嘅分析員，當然一定有留意。大家如果有經常睇《金手指》，一定會話：「邵爵士嘅TVB，加埋報業呢幾年嘅衝擊，李澤楷嘅參與，收音機界話要殺死已經完成歷史任務嘅香港電台。孫柏文一定係又想講互聯網會玩晒，呢個理論。」啱，不過有如國家主席江澤民話齋，千祈唔好咁簡單睇呢件事。
講真，孫柏文睇今時今日我哋特區嘅傳媒業，真係覺得好似我哋20世紀初嘅祖國。互聯網就好似當年全球崛起工業革命一樣，令到一啲大家已經好習慣嘅現實出現巨變。好簡單咁諗，如果你喺1900年嘅北京問一個人，同佢講話：「信唔信喺十幾年之內，不單止滿清政府被推翻，有幾千年歷史嘅皇帝制，都因為有共和國嘅出現而冇咗？」雖然嗰個人，可能同大家一樣，只係骨子裏感覺到「當時嘅現況」係有啲唔妥，不過都好難實牙實齒話會玩完。
仲有，如果你真係可以說服嗰位仁兄，令佢相信滿清會被推翻、帝制會被廢除，不過佢問番你轉頭：「咁我應該點樣做先至可以乘機發達？」都真係好難答佢。你會叫佢當軍？做官？勾結外國勢力？甚至叫佢移民？
當然，你可能覺得有啲建議冇理由錯。就算喺亂世當中，都應該用得着。例如，我哋中國人自古至今，都相信書中自有黃金屋，如果你同嗰位仁兄講：「讀多啲書有着數。」而佢真係埋頭苦幹咁讀書，點知道，差唔多讀成嘅時候，就連科舉都冇埋，你就已經害咗佢。同樣，做電視台希望拍劇拍得好就冇事，點知道，喺互聯網世界，因為容易做盜版，可能呢個模式已經冇運行。
最後講番TVB，如果用滿清政府做比喻，佢哋嘅收費電視真係太似當年嘅「頤和園」。不過如果你問我今時今日嘅「北洋艦隊」係乜，我都暫時答唔到你，最終只係講一句，希望TVB嘅慈禧太后有信得過嘅親信同佢講真話。如果唔係，TVB就真係會好似當年滿清政府一樣，被歷史巨浪活埋。
孫柏文