踏入暑假，少不免戶外活動一番，想影得靚係人都知拎部單鏡DC最穩陣，起碼反應夠快唔怕Miss！牛龜咁大部唔想拎？不如玩細機，影嗰刻先拎佢出嚟，絕對符合SnapShot大原則；咪以為細機唔夠班，CASIO最新嘅EX-Z70，就配備高速快門、「AntiShakeDSP」防手震以及快速拍攝等元素，即使滑浪、賽車呢類高速場面，都可以同「鬆、郁、矇」講ByeBye！
記者：陳國輝
攝影：黃子偉 ImageGirl：Kibby
鳴謝：海之家（26044747）
Z70延續上代Z60強項，除機身仍保持19.8mm激薄厚度之外，亦繼承傳統以嚟好User-friendly嘅「簡易模式」操作，介面圖文並茂，外行人都好快上手。雖然今次未見到大幅進化，不過CCD像素已由上一代嘅600萬像，提升至現時720萬像，配搭埋該系列嘅快速拍攝系統，想瞬間影張A3Size滑浪大特寫，比以前就更加Easy！只可惜，Z70唔及上一代咁好色，今次僅提供黑、銀兩隻，比起Z60當時推出埋法拉利紅，當然冇咁搶眼！
CASIOEX-Z70
行貨價$2,380
（送512MBSD卡）
開機Shutter快狠準
攝一輯專業滑水相，條件在於能否捕捉最動態嗰一刻！Z70唔算卡片機入面最Top嗰款，但起碼叫快、狠、準嗰隻！開機只需1.4秒，即進入拍攝狀態，按下快門後，拍攝時滯大概為0.002秒，用嚟捕捉每一個精采滑水花式動作適合不過。對焦方面，Z70提供高速快門，如果環境比較暗，仲可以用1秒連拍3幅嘅「RapidFlash」功能，雙管齊下效果更顯著。講到準繩唔走樣，當然要靠內置嘅「AntiShakeDSP」防震技術，能減輕因機身搖晃，或被攝主體移動時引起嘅模糊影像，再自動修正，當企喺搖擺不定嘅船身上拍攝，簡直Fit晒！
滑水必玩4分唇
用嚟拍攝高速滑浪鏡頭，除咗用單鏡機，只要動一動腦筋，其實儍瓜機一樣做得到，Z70就具備以下幾項有利拍攝滑浪嘅分唇，即睇！
PanFocus（PF）能夠將對焦範圍鎖死，只要一㩒快門即自動拍攝，慳番對焦時間，取景超快！
高速快門能將移動中嘅物件，清晰地拍低，例如跑步、賽車，滑浪嗰陣最啱拍攝水花四濺一刻！
內置數碼防手震功能，優點係站於搖晃船身之上，仍可拍攝穩定照片，缺點係推高ISO會令畫質下降。
喺大海烈日當中，難免會出現嚴重背光問題，呢項功能可以加強膚色、強制閃光，令人像唔再黑面。
機仔都可玩閃燈
閃燈功能其實唔淨只應付昏暗環境咁齋，Z70仲配置埋幾款閃燈Mode，唔講唔知，試用發現原來分別係咁大！
未開閃燈 雜訊好勁
喺室內唔着閃燈拍攝嘅話，即現黑色一點點雜訊，而且人像失去晒立體感，一啲都唔Sharp。
柔和閃燈 影人唔爆
距約2米打柔和閃燈後，令整體顏色略帶啡黃，不過雜訊冇咁勁，而細微部份則較為豐富。
快速閃燈 流水定型
1秒內進行3幅拍攝，速度非常之快，連水嘅形態、彈出嘅水滴都影得好清楚。
滑水導師Eric：細部安全啲
平日身兼遊艇船主導師，到周末即變身為滑水教練嘅Eric，最大興趣當然係揸船出海兼滑浪，雖然佢甚少接觸數碼產品，但講到玩DC，佢都有獨特嘅睇法：「最緊要細部啦！我艘船只可以載3、4個人，滑浪嗰陣會開得好快，如果兩隻手用晒嚟影相，咁好容易被拋落海，非常危險；相反，卡片機單手就玩到，另1隻手用嚟扶穩船身平衡，咁先安全得多嘛！」小記心諗，身為運動教練，果然以安全行先，抵讚！
PROFILE
有效像素：720萬像素CCD
鏡頭：3×光學變焦
屏幕：2.5"TFT
對焦模式：自動微距/9點多樣自動對焦/高速快門
動畫格式：640×480（每秒30格）
記憶卡：SD卡
體積：95.2×60.6×19.8mm
主要功能：AntiShakeDSP防手震、33種場景模式、快速/柔和閃燈、舊相修復、動畫編輯
查詢：捷成洋行（29262320）