熱刺嘅隊長京治真係黑過墨斗，先有世盃前受傷冇份入選英格蘭最後大軍，最近又喺球會操練整親膝頭，搞到要養傷兩個月；熱刺將會同另1支同市球會阿仙奴一樣，季初冇乜中堅可以調配，事關辛德路斯又係要長唞，實行兩支倫敦球會一齊鬧「中堅荒」。
之前有江湖傳聞，話京治原本有機會過檔阿仙奴，原因係領隊雲格諗住搵佢頂蘇甘保同辛德路斯個中堅位。講真，京治有幾多料大家都心照啦，今次陰差陽錯要避戰成兩個月，阿仙奴簽唔到佢，或者可能仲要開香檳，球迷唔使愁喎。
傳原有機會過阿仙奴
聽講今次隊長京治被同市球會挖角，已經搞到熱刺領隊祖爾鬼死咁驚青，不過𠵱家京治受傷要長唞，祖爾又係冇乜中堅可用，佢都係得個「驚字」。祖爾話：「天呀！冇咗京治對我隊波好大影響㗎！仲要唞兩個月？你唔係咁玩我呀！」計我求大俠話，熱刺冇咗京治唔係世界末日，祖爾咪對京治咁高期望先得㗎。
不過求大俠都試過做球員，好明白球員受傷冇得比賽嘅心情，呢啲嘢同個人「黑」有好大關係。京治雖然係黑人，但係我求大俠講緊嘅就絕對冇包含種族歧視成份在內，我意思係人有三衰六旺，黑起上嚟真係有條路咁解啫。
「京治呢期可謂黑氣蓋天，傷完又傷，作為球員梗係冇晒癮啦！如果求大俠係京治嘅話，就好應該去車公廟買個風車返嚟轉轉佢，話唔埋可以入選國家隊之餘，仲做埋英軍隊長㗎！」