青少年軍事夏令營噚日舉行畢業典禮，雖然天氣好熱，但都有唔少嘉賓遠道而來。董伯伯以政協副主席身份去完唐山，話咁快就返咗香港，仲出席軍事夏令營畢業禮，支持吓董太。
二少唔夠董太多fans
而駐港部隊司令員王繼堂、中聯辦副主任李剛、保安局局長李少光、港大校長徐立之、民政事務局常秘林鄭月娥、高永文醫生以及TVB總經理陳志雲……都有嚟頒獎畀結業嘅年輕人，做布景板都唔拘，真係好有心。
身為呢個夏令營活動主席嘅二少田北辰，付出更多。二少自爆喺夏令營中，因為成日聽到班學員練習射擊，「搞到震親個耳膜」。好彩係震親，唔係震穿，否則分分鐘變成「聾耳田」；其實耳仔唔靈都有好處，唔使聽埋咁多閒言閒語。不過，田二少雖然為咗班細路而耳膜受傷，在場所見，班畢業生似乎唔多領情，好少人搵田二少影相，唔知係咪佢個樣cool得滯？
反而話自己「見到班仔畢業，笑到好似蓮子蓉」咁嘅董太好受小朋友歡迎。董太一到場，馬上有幾位女士上前同佢「相認」，又攬又握手，班fans搞到董太鬼咁興奮。佢仲同八方講，個夏令營「以後年年都要搞」，所以年年暑假大家都可以見到佢喎。
聽班學員講，入營之後學識咗敬禮同步操，坐喺度條腰都挺直咗！董太同田二少咁辛苦，但對未來社會棟樑有啲貢獻都係值得嘅。有個學員話喺營內要6點起身，10點就瞓，冇得打機，好慘好慘，所以話噚日一畢業就會返屋企瞓餐飽。
八方冇見老董一排，佢身形冇變，唔做特首少咗好多嘢煩，應該心情輕鬆啲，但係佢個眼袋好似仲大咗。老董又冇聽煲呔點，佢着住成套「老西」，不停咁用白色手帕抹汗，相反旁邊嘅中聯辦副主任李剛就好追上形勢，一身短袖運動服出現，好涼爽。
高永文醫生坐咗喺台下嘅觀眾席，董伯伯走嘅時候見到佢，雖然冇交談，不過董伯伯都有同佢擁抱一下，但高永文似乎唔係幾慣，笑得非常尷尬。
老董照舊乜都等一陣
現場有唔少市民見到董伯伯都拉住佢影相，難得咁受歡迎，董伯伯好開心，仲猛咁同班學員家長揮手。八方問董伯伯近排有咩忙，佢好熱情咁搭住八方膊頭，笑笑口話「一陣間先同你講。」之後有行家問董伯伯點睇陳太同葉太，佢又係搭晒膊頭，話「第日搵你哋傾。」
