香草乜乜，香草物物，成日食甚麼香草意粉、香草扁麵，放入口的確有陣似是而非嘅香味，但講真你又知唔知究竟食咗乜嘢香草落肚？學嘢喇，今日介紹嘅菜式，全部用新鮮法國香草入饌，夠香就梗㗎嘞，仲有大廚話埋畀你聽乜香草搭乜食材最好味，包你有嘢學又食得開心。
記者：黃若茵
攝影：譚盈傑
模特兒：Hibernia（Salvador）
新鮮香草保持原味
因乜事搞法國品種香草宴？「Pepino's」總廚Alan解釋：「𠵱家夏天吖嘛，呢個時候嘅香草開得最靚，無論係氣候抑或土壤，都最適合法國品種嘅香草生長。」香草我見過唔少次，不過每次見親都係切碎晒一粒粒葉碎咁嘅樣，再望吓Alan畀我睇嘅香草，咦？點解全部都係一棵棵嘅？「呢啲係新鮮香草，一般餐廳用嘅都係亁香草，亁香草烘製過，會流失晒大部份味道，除咗Rosemary例外，因為佢味道夠濃烈。所以我一定揀最新鮮嘅香草入饌，因為擺唔耐，所以每次都係小量入貨，兩三日就要用晒佢。今次呢個香草宴，我都睇咗唔少參考書，務求搵出邊種香草同邊種食材味道最夾。」
大陸貨靚唔用來佬貨
以為用法國空運到港嘅香草最好？原來又唔係噃！Alan話：「如果由法國訂購，一來時間長香草到港會變得唔新鮮，二來訂貨須時太耐，嚟唔切供應，所以𠵱家我揀內地種植嘅香草，貪佢運貨時間短，一小批一小批咁訂貨，保證香草新鮮。」聽到係大陸貨，都難免有點心驚，唔知質素有無保證喎，「放心喇，十幾年前大陸已經開始培植法國香草，以前品質的確比較差，但𠵱家已經有番咁上下質素，唔需要喺溫室入面種植，一樣好天然好健康。」聽到佢咁講，打死唔執輸嘅我一於生嚼，試勻咁多款香草，唔！真係好新鮮，味道有濃烈有清香，再食埋個香草宴，嘩，成晚個口都係咁香呀。
紫蘇鮮蝦蘋果沙律$88
紫蘇（左Basil）辛辣芳香，令呢個頭盤更清爽，另加意大利芫荽（右ItalianParsley），味道較淡勝在同其他香草百搭，兼煮後顏色保持翠綠，令沙律更添田園氣息。鮮蝦好甜，青蘋果甜中帶酸夠醒胃。
百里香菜湯$78
百里香（上Thyme），原產地地中海及西歐，香味濃郁但唔霸道；奧里根（左Oregano）微帶辛辣；最後加茴芹（右Chervil），突出蔬果鮮味。雜菜有西芹、甘笋同意大利青瓜，切粒放湯清香有嚼勁。
馬組林雞胸$178
馬組林，或譯馬郁蘭（Marjoran）原產於地中海，壓扁攪碎後甘味甚濃，味道有點似薄荷，同肉類最夾。師傅將雞肉割開，釀入白菌及巴馬臣芝士，一口可吃到腍、爽兩種不同口感。
香草扁意粉$168
主要用紫蘇（Basil）搭其他唔同香草，雖有多種香草混雜，但味道調校恰當，滲於每條扁麵之間，啖啖清新。扁麵配料有牛肝菌，夠鮮，同香草味混為一體，我勁Like，食到照鏡先肯放低刀叉。
達力根龍脷柳$198
達力根，又名龍蒿葉（Tarragon），原產俄國南部，不過以法國品種特別亮澤較香，味甜易入口，同魚類最夾。呢個菜英文名叫「Minabean」，創自一位法國名廚，意思係用達力根香草跟龍脷柳一齊煮，再加入鹹魚仔同白忌廉汁，好甜美。
香草玫瑰花茶$28
迷迭香（Rosemary）原產自地中海沿岸，味道極濃烈，歷久不散，適合用作花茶。呢個花茶另加入玫瑰花，芳郁撲鼻，飯後飲番啖，絕對係呢餐香草宴嘅完美終結。
食客有Say
最Buy邊種香草？
搵食攻略
Pepino's意大利餐廳（25984599）
地址：灣仔謝斐道238號1樓
營業時間：星期一至六12:00nn-3:00pm，6:00pm-11:00pm，星期日6:00pm-11:00pm
交通：灣仔地鐵站A3出口
座位：77個
人均消費：午市$150-$200，晚市$200-$300
有着數：滙豐及恒生信用卡可獲85折優惠
最好賣：羊架，日賣20份
註：可選擇套餐形式惠顧「香草四射」晚餐，包括1款頭盤、1款主菜及香草玫瑰花茶，每客$268