近排傳媒界好不熱鬧，先有小小超李澤楷買《信報》，前日就有邵氏賣盤，傳媒人講傳媒事應該最「到肉」，噚日蔡東豪喺港台開咪講呢兩單嘢，八方當然捧場，除咗因為東尼（蔡東豪洋名）一向見解獨到，加上佢用原復生筆名喺《信報》寫出名堂，佢老哥講《信報》點可以錯過。
好多人都想知，點解小小超要買《信報》？東尼認為，肯出錢買報館嘅只有三類人，一係就當一盤生意咁做，但係兩億幾銀都唔夠小小超起間別墅，咁「奀雞」嘅生意，小小超唔似會有興趣。
第二類就係想藉住擁有傳媒加強影響力，鼓吹政治或者宗教信仰，咁多年嚟，都無見過小小超講政治，所以佢應該唔係呢一類買家。
剩番第三類，就係香港獨有嘅，就係盤生意有「搞掂」價值。乜嘢叫「搞掂」價值？咪就係碰到同北大人有關嘅事就「冇問題，一定『搞掂』。」東尼話，若然小小超要爭取「搞掂」價值，電盈單刁就唔會搞成咁。
三類買家都唔係，究竟小小超為乜買《信報》？東尼話諗咗好耐，結果由一單新聞攞到啟示，就係王以智用億二銀學跳舞。東尼斷定，澤楷買《信報》只因三個字──「我鍾意」，更到肉嘅答案係──「我鍾意，你吹呀！」東尼強調，自己唔知真相，純粹係個人揣測。