迪士尼樂園出新招吸引顧客，目的梗係想個場旺啲，佢哋位行政總裁安明智同八方講，啲內地客已經陸續返嚟，而佢哋嘅對手海洋公園高層都買咗張SummerPass入場，大家互相觀摩。
講開觀摩，阿Bill（安明智英文名）8月會去上海一行，試食之外，希望會有啲新思維。八方問佢係咪上海都會有迪士尼，佢話目前十畫都未有一撇。原來阿Bill好鍾意去旅行，下一站最想去嘅係西藏，仲計劃明年成行，坐京藏鐵路入藏，諗起沿途嘅風景，已經令佢十分雀躍。
香港迪士尼一直被人彈規模太細，其實佢哋仲有好多發展空間，起第三第四甚至第五間度假酒店都得，到時香港人可以慳番船票同機票，連澳門同布吉都唔使去喇。