梁詠琪準備不足
「我入行至今都影過唔少相，最令我印象深刻係有次去瑞士少女峯拍國語碟唱片封套，我要穿上吊帶裙赤腳喺雪地上影相，當時好凍，我又冇乜做禦寒措施，凍到打晒冷震，啲腳趾凍到變晒紫色，我幾驚啲腳趾凍到甩鬼晒，好彩後來都冇事，但係我都已經怕咗去咁凍嘅地方拍嘢。」
馬國明來電怪嚇
「我同班足球波友有個習慣，就係影低對方鬼臉做電話來電顯示，每逢有新波友加盟，都要逐一俾我哋影，張張都好好笑。仲有以前讀中五時，一班同學去宿營，大家互相將對方畫成大花臉，之後就影相留念，有啲樣真係花到睇唔出係邊個。」
Toby賣肉尷尬
「唔好睇我鬼妹仔性格，其實我份人都幾保守，有次要着泳衣影寫真集，嗰時着咗件類似三點式嘅泳衣，雖然上身唔係得三角，但已經覺得好激，成日驚走光，所以着出嚟感覺都唔舒服，真係幾抗拒性感裝束，好彩𠵱家連公司都知我呢種性格，所以好多時佢哋都唔會接一啲要太性感嘅job畀我。」
張致恆專影醜態
「我好鍾意影相，尤其係捕捉人哋嘅醜態，我成日都帶備相機，喺佢哋唔為意時偷影，好似平時Dennis坐保母車瞓到翻白眼嘅相，其實Kenny、Joey、Twins同好多人都俾我影過，𠵱家都有一批相喺手，我希望下年可以推出自己首本相集，同大家分享平時影嘅靚相，而啲醜樣相就睇吓邊個對我好，咁就放佢一馬唔登啦。」
