曾特首近來鍾意講環保，話要潔淨香港空氣，讓香港重見藍天白雲。其實講空氣，非自今日始，記得李國寶議員喺二○○○年競選連任時，已講及空氣，不過香港人講空氣，其實係空談，如果珠三角工廠唔合作，香港空氣永遠污染，夠膽就叫中電港燈停止發電三日，睇吓香港空氣污染有冇改善吖！叫珠三角停電三日，情況就會好得多。
但呢啲「控制實驗」，當然完全冇法子推行，香港停電半小時，冇可能容忍。曾特首「忽然」想到一個方法，靈感當然來自環保團體，就係叫我哋駕車人士停車熄匙，可以減少二氧化碳排放量喎。左丁山呢幾日，要揸車送貨載人，做咗七日司機，先至知道司機揸車之小小苦楚。
呢幾日嘅天氣有兩大特點，（一）非常熱，稍為勞動，就滿頭大汗，（二）間中有大雨，有黃雨警告。左丁山某日揸車到達目的地，停低等人，想起要做一個良好公民，討好曾特首，於是開窗之後，熄匙！唔夠一分鐘，猛烈太陽之威力無窮，即刻感覺到；再過三分鐘，嘩，熱死人呀，架車好似焗爐，皮椅令屁股熱上加熱，真難頂。五分鐘後，大人駕到，一上車就鬧，「架車咁熱㗎，你冇開冷氣咩？」
第二日，開車送貨，停低架車，收貨人未到，大雨傾盆而下，停車熄匙，唔開得窗，三分鐘後幾乎焗暈，唯有放棄做一個好公民嘅念頭，向曾特首講一聲對唔住，撻着引擎開冷氣先！
講停車熄匙之人，正是在室內冷氣辦公室誇誇其談，出咗寫字樓就有司機開定車門等佢上車之人，例如曾特首去酒店出席午間聚會，佢司機在外面停車熄匙，特首上車之時係唔係要即刻除西裝，掹煲呔，幾乎連恤衫都會剝埋呢？呢一類人就係未做過司機，未揸過車，永遠乘搭冷氣巴、冷氣的、地鐵之人，佢哋唔會明白香港夏天在中環、銅鑼灣或公園外停車熄匙之苦況。不如曾俊華權充特首司機一星期之後，再向特首報告停車熄匙嘅後果吖！