胡諾言
愛大花面
「以前出外拍劇，同事之間好興影低對方瞓覺嘅醜態，有時嫌唔夠勁，仲要將對方畫成大花臉，我都試過好多次俾人整蠱，每次佢哋都話畀番張相我，但係次次都係冇蹤影。相反我影人哋醜態，就會用啲特別角度影，例如從低影番上去，中間影埋佢嘅手、或者係膊頭咁，望落去醜得嚟有啲藝術味道。」
衞詩
怒撕醜照
「我細個時候極之唔上鏡，差唔多每張相都唔靚，每逢見到醜樣嘅相我就會撕咗佢，冇得留低。其實我同家姐（衞蘭）出世到11歲都好似樣，到14歲開始各自有唔同嘅style，家姐每次影相都好上鏡，但我就醜樣，試過家姐見我撕相就叫我唔好撕，撕咗就冇晒，所以我唔係有好多10幾歲嘅相可以留到𠵱家。」
陳小春
怕冷色變
「我影相冇乜好難忘回憶，反而拍戲就試過令我到𠵱家都印象深刻。嗰時喺上海拍緊戲，氣溫只得0℃，但係我哋竟然要拍夏天嘅戲份，着短衫短褲，最慘就係要淋住雨拍，搞到我事前要用保鮮紙包住全身，仲要飲埋二鍋頭暖身，因為飲咗少少酒就會馬上暖。我見到啲演員由紅色變藍色再變紫色，我估自己都係一樣。」
薛凱琪
用心攝影
「最深刻就梗係上次為CD封套影嗰輯相啦，嗰次啲相我全部都係自己用電話嚟影。當時都有人同我講話我唔pro（professional專業），不過我都冇受影響，又有好多人支持我。其實最重要係想話畀大家知，唔一定要用好專業嘅器材嚟拍，只要有心就一定可以影到靚相㗎喇。」
採訪：駱華齡、馬建華、藍文浩
